Helsehjelp i heimen - heimesjukepleie

Heimesjukepleie er ei helseteneste som vert gitt til personar som har behov for nødvendig helsehjelp i eigen heim. Tenesta rettar seg mot personar med akutt eller kronisk sjukdom, kognitiv svikt eller funksjonsnedsetting, og vert tildelt etter ei fagleg vurdering som tek utgangspunkt i brukaren sitt funksjonsnivå og helsetilstand. Heimesjukepleie vert tildelt som punktvise besøk individuelt tilpassa brukaren. Målet med tenesta er å gi støtte og hjelp slik at brukaren kan bu heime så lenge som mogleg.

Kven kan få tenesta

Heimesjukepleie kan tildelast personar som bur eller oppheld seg mellombels i Ulvik herad, og som har behov for helsehjelp i heimen. Dette kan vere personar med akutt eller kronisk sjukdom, kognitiv svikt eller nedsett funksjonsevne, og som heilt eller delvis ikkje klarer å utføra nødvendige helse- og omsorgsoppgåver sjølv. Behovet blir vurdert gjennom ei fagleg kartlegging med særleg vekt på funksjonsnivå, evne til eigenomsorg og den samla helsetilstanden.

Avgrensingar

• Pasientar som er mobile skal som hovudregel få hjelp ved fastlegekontoret ved behov for til dømes stell av sår, skift av kateter eller dren, blodprøvar eller injeksjonar.
• Dersom hjelpebehovet kan løysast ved bruk av hjelpemiddel eller velferdsteknologiske løysingar, er utgangspunktet at ein først skal forsøke dette - I slike tilfelle kan det bli gitt opplæring i bruk av utstyret i ein avgrensa periode.

Eigenbetaling

Tenesta er gratis

Heimel

  • Pasient- og brukarrettslova § 2-1
  • Helse- og omsorgstenestelova § 3-2 nr. 6 bokstav a

 

Søknad

Søknad om helse- og omsorgstenester

Publisert 13.08.2026 09.50
Sist endra 13.08.2026 10.00